| 老豆 安息吧... 已經差不多快忘記呢個blog...但響個心情複雜既時候, 突然想寫野... 2006年10月, 老豆癌病復發, 搏鬥左1年多, 2007年12月23日, 安息主懷... 身為兒子既我, 心情十分複雜... 一方面唔能夠接受佢突然離去, 另一方面為佢得到解脫而感到安慰... 老媽子同妹喊得好犀利, 我亦係...但我算好快就平復下來 可能我一早有心理準備(上星期五佢話夢見好多人同佢一齊訓, 仲係過左身既人), 另一方面真係唔忍心佢咁樣比病魔折磨... 我其實好自責, 當佢最清醒, 可以傾計既時候我唔響佢身邊, 下午病情急轉, 雖然仲清醒, 但已經講唔倒野... 我真係估唔倒一個人既病情係可以轉變得咁快... 昨晚我話去食d野, 轉頭15分鐘返, 老豆都話唔比, 但我見佢都幾穩定, 都係去左 結果食完返黎, 老豆仲係清醒既, 幫佢換衫後就訓著左...永遠訓著... 當佢訓著時, 我地都仲未知原來佢已經唔得...以為真係訓左...結果心跳愈來愈慢... 老豆...原來你係等到我地返哂黎, 你先放心去...我明白啦...對唔住... 你生前既時候, 我做仔...完全唔合格...激到你咁...對唔住... 但我講十萬句對唔住都冇用, 你已經聽唔倒... 你知道嗎? 老媽子喊得好犀利, 好傷心...佢雖然成日哦你...但事實上, 佢真係好愛你... 老豆, 你勞勞碌碌幾十年, 兒子女兒都長大, 但卻冇份享兒女福... 雖然你好少陪我地, 但你辛苦工作, 將最好最好既都給予我地...做兒子既永遠都唔會忘記呢份情義... 我一定會做到你既心願, 令呢個家和睦...親愛既父親, 你放心, 安心上路... |
